'තව ම පණ තියෙනවා'
පද ,සංගීතය හා ගායනය - අභිෂේකා විමලවීර.
සින්දුවක පද, සංගීතය හා ගායනය කියන පැති තුන ම තනිය ම අල්ලපු, අල්ලන නිර්මාණකරුවන් මේ ලෝකෙ ඕන තරම් ඉන්නවා. ලංකාවෙත් ඉන්නවා. හැබැයි ඒ පැති තුනෙන් ම එක වගේ සාර්ථක වෙච්ච අය නම් ටිකක් අඩු යි. අද අපි කතා කරන්න තීරණය කළ සින්දුවත් ඒ වගේ එකක්.එහෙම කියලා අභිෂේකා මේ පැති තුනෙන් ම එක තරමට ම සාර්ථක වෙලා තියෙනවා කියලා කියන්න අපි හදිස්සි වෙන්නෙ නෑ.
ඒ වුණාට මේ සින්දුවෙ විශේෂත්වයක් තියෙනවා. ඒ තමයි මේ සින්දුව ලියවිලා තියෙන්නෙ කයින් පිරිමි වුණත් මනසින් ස්ත්රියක් වෙච්ච තැනැත්තියක් ගැන. ඒකෙන් අදහස් වෙන්නෙ එම ජන ප්රජාව විශේෂිත කණ්ඩායමක් කියන එක නෙවෙයි. ඒ ජන කණ්ඩායම විශේෂ යි කියල හිතන එක ම වර්ගවාදී දෘෂ්ටිවාදයකට ලඝු වීමක් කියල යි අපිට හිතෙන්නේ. ලංකාවෙ සමහර ඛඨඊඔෂූ ක්රියාකාරීන් ම සමහර වෙලාවට මේ වර්ගවාදයට ඇද වැටෙනව කියලා පේන්න තියෙනවා.
අපි මේ සින්දුවෙ දකින විශේෂත්වය වෙන්නෙ මේ සින්දුවෙ දි ඒ ජන කණ්ඩායමට කටහඬක් ලබා දෙන එක. මොකද, ලංකාවෙ සින්දු ඇතුළෙ ඉන්නෙ එක්කො සම්පූර්ණයෙන් ම පිරිමි නැත්නම් ගැහැනු කථකයන්. සංක්රාන්ති ලිංගික කථකයන් හරි කථක ස්ත්රීන් හරි අපිට හම්බ වෙන්නෙ ම නැති තරම්. හරිත් විජේරත්න ගයන “පුදසුන” වගේ සින්දුවකුත් මේ අඩුව පුරවන්න උත්සාහ දරල තියෙනව කියලා කියන්න පුළුවන්.
ඒ කියන්නෙ මේ විෂය සිංහල සින්දුවෙ තවත් එක අන්ධ බින්දුවක් විදියට දකින්න අපිට පුළුවන්. අඩු ම තරමෙ සමරිසි බව ගැන ලංකාවෙ සින්දුවලින් කතා කරල තියෙන තරමටවත් මේ ගැටලුව ගැන සිංහල සින්දුවලින් කතා කරලා නෑ. ලංකාවෙ අනෙක් සාහිත්ය - කලා ශානර එක්ක බලනකොට ඒ අතින් සිංහල සින්දුව තියෙන්නෙ ගොඩක් පහළ කියලා ලියන්න වෙනවා. සමාජයේ විවිධත්වය වෙනුවෙන් කටහඬ කැප කරන්න තීරණය කරපු එක ගැන හරීන් විජේරත්නට අභිෂේකාට අපේ ගෞරවය හිමි වෙන්නෙ අන්න ඒ නිසා.
ජාත්යන්තර සම්මුති, ආණ්ඩු ක්රම ව්යවස්ථා, නීති සංග්රහවලින් විසඳන්න බැරි තරම් අන්තයකට ලිංගිකත්වය මත සිද්ධ වෙන වෙනස්කම් ලංකාව වගේ රටවල වර්ධනය වෙලා තියෙනවා. සින්දුවෙ මුල් කොටසේ ම ඒ වෙනස්කම් කිරීම නිසා ඔව්න්ට ඇති වෙන පීඩනය අභිෂේකා ලියනවා;ගයනවා.
“ආදරේ හිතෙනව ද අහනවා”
“හාදු මට දැනෙනවද අහනවා”
“කිරි වරම් නෑ නේද අහනවා”
සමාජයෙන් නැගෙන මේ ප්රශ්නවලින් පේන්නෙ වෙන මොකවත් නෙවෙයි, ඒ ප්රශ්න නඟන සමාජය කොයි තරම් මනුෂ්ය විරෝධී ද කියන එක. ඇත්තට ම නම් ඒ සමාජය මනුෂ්යත්යට අදාළ විවිධත්වය ගැන කොයි තරම් අසංවේදී ද කියන එක තමයි අපිට ඒ ප්රශ්නවලින් අඳුන ගන්න පුළුවන් වෙන්නෙ.
“කිරි නැතත් පපුවෙ ඉඩකඩ තියෙනවා” කියන පිළිතුර මේ ප්රශ්නවලට එරෙහිව ලබා දෙන පිළිතුරු අතර තමන්ට අහිමි කළ, තමන්ගෙන් උදුරා ගත් ගෞරවය, භක්තිය, අගය, සන්තුෂ්ටිය හා වීරත්වය යළි ඉල්ලා සිටින බරපතළ ප්රකාශයක් විදියට භාර ගන්න සිද්ධ වෙනවා. ලංකාව වගේ රටවල ගැහැනුකම යි මාතෘත්වය යි අතර තියෙන සම්බන්ධය ස්වාභාවික කරන්න ගොඩනඟන තර්කවල තියෙන ෆැසිස්ට්වාදී බවට එරෙහි හඬක් ඒ පිළිතුරෙන් නින්නාද වෙනවා. “මව්කිරි” වගේ රූපකයක් ඉතිහාසයේ භාවිත වෙලා තියෙන ශුද්ධෝත්තම ස්වභාවය මේ වෙනකොට කොයි තරම් දූෂණය වෙලා ද, කියලා පෙන්වලා දෙන එක, එක අතකින් ජාතිකවාදී භාෂා ව්යාපෘතිවල තියෙන සීමාකමුත් සනිටුහන් කරන්නක් කියලා අපිට හිතෙනවා.
අභිෂේකාගෙ මේ සින්දුව පැති තුනෙන් ම එක තරමට ම සාර්ථක යි කියලා කියන්න අපි හදිස්සි නො වුණෙ ඇයි කියලා දැන් කියන්නම්.
මේ සින්දුවෙ දි අභිෂේකා කරපු වැදගත් ම වැඩේ කියලා අපි හිතන්නෙ, තමන්ගෙ කටහඬ සංක්රාන්ති ලිංගික අනන්යතාවයක් තියෙන කෙනෙක්ගෙ කටහඬ නිරූපණය කරන්න යොදා ගත්ත එක. එහෙමත් නැත්නම් අභිෂේකා ඒ චරිතයට තදාත්ම්ය වෙන එක.
ඒ වුණාට අභිෂේකාට ඒ තදාත්ම්ය වීම අඛණ්ඩව පවත්වා ගන්න ලැබෙන්නෙ නෑ. ඒකට ප්රධාන හේතුව වෙන්නෙ පද රචනාව ඇතුළෙ නාභිගත කිරීම (දෘෂ්ටි කෝණය) පැටලීම. මුලින් ම ගැයෙන කොටස් දෙකේ උත්තම පුරුෂයෙන් තමන් ම ඒ චරිතයට ආවේශ වෙන අභිෂේකාට අන්තිම කොටසෙ දි ඒ චරිතයෙන් මිදිලා ප්රථම පුරුෂයෙන් ඒ චරිතයට ශක්තිය ධෛර්ය ප්රාර්ථනා කරන්න සිද්ධ වෙනවා. එතකොට ගායිකාව අර චරිතයෙන් එළියට ඇවිල්ලා. ඒකෙන් වෙන්නෙ මේ සින්දුව චරිතය විසින් කියන්නක් වෙනුවට චරිතය ගැන කියන්නක් බවට පත් වෙන එක. එහෙම වෙන එක සින්දුවෙ තිබුණ රැඩිකල්කමට තර්ජනයක් වෙනවා.
අඛණ්ඩව ඒ චරිතයට අනන්ය වෙලා ඉන්න අභිෂේකාට බැරි වෙන්නෙ ම හාත්පස තහවුරු වෙලා තියෙන දෘෂ්ටිවාදී බලපෑම නිසා කියල යි අපිට හිතෙන්නෙ. අධිපති දෘෂ්ටිවාදයන්ට එරෙහිව සිදු කරන අරගලය ඇට මස් ලේ නහරවලට ඇතුළු කර ගන්න බැරි වුණා ම සිද්ධ වෙන සෞන්දර්යවාදී ප්රකාශනයේ අසම්පූර්ණත්වය තමයි එතන දි අපිට පේන්නෙ කියලා ට්රොට්ස්කිවාදී ස්වරයකින් අපිට කියන්න පුළුවන්.
ජීව විද්යාත්මකව ගැහැනු කටහඬකින් මේ ප්රශ්නය කතා කරනවට වඩා අපි හිතනවා ඇත්තට ම සංක්රාන්ති කටහඬකින් ම මේ අර්බුදය ගායනා කරන එක වඩා විප්ලවකාරී භාවිතයක් වෙයි කියලා. සම් මස් ලේ නහරවලට ම මේ අර්බුදය දැනෙන්නෙ ඔවුන්ට මිස අපිට නෙවෙයි කියලා අපි නම් පිළිගන්නවා. අන්න එහෙම වුණ දවසක නම් “භූමියට තාම පණ තියෙනවා” කියන යෙදුමට මීට වඩා අර්ථයක් ලැබෙයි කියලා අපි හිතනවා.
ඉතින් ඒ ගායනය අහන්න.
ආදරේ හිතෙනවද අහනවා
ඔව් මටත් ආදරේ හිතෙනවා
හාදු මට දැනෙනවද අහනවා
ඔව් මමත් උණුහුමක් හොයනවා
කිරි වරම් නෑ නේද අහනවා
කිරි නැතත් පපුවෙ ඉඩකඩ තියෙනවා
මුගුරක් අරන් ඇනපන් තදින්
භූමියට තාම පණ තියෙනවා
හත් මාල නළල් පට නෑ
සුදු නෙලූම් රෝස පෙති නෑ
නෙත් අඳුන් යටින්
උනනා කඳුළැල් ඔබ දුටුවේ නම් නෑ
මුගුරක් අරන් ඇනපන් තදින්
භූමියට තාම පණ තියෙනවා
ගිනි කඳුළෙන් දෙමට මලෙන්
නයි කඳුළෙන් නුග කොළයෙන්
ඉපදුණු සත් පත්තිනි බල මහිමෙන්
දිරිය අරන් පිපියන්..
මුගුරක් අරන් ඇනපන් තදින්
භූමියට තාම පණ තියෙනවා.
Comments
Post a Comment