සත්‍ය වසන් කරන්නට මැවූ ව්‍යාජ සතුරන්ගේ කථාව 'The Sea Beast'

ඉතිහාසය පුරාවට අපට විවිධ සතුරන් සිටින ලදී. විදෙස් ආක්‍රමණිකයන්, තමිල් ජනතාව ආදී ලෙස විවිධ කාලවල විවිධ සතුරන්. අපිව හා අපේ රට ජාතිය විනාශ කිරීමට සිටිනා නානප්‍රකාර සතුරන් ඉතිහාසයේ සිට වර්තමානය දක්වා අපට හමුවෙයි. එම සතුරන් සමග සිදුවෙන දරුණු සටන්, ඒවායේදී දිවිපුදා රට ජාතිය බේරාගන්නා වීරයන් හැමදාම සිටින ලදී. මහාවංශය වැනි ඉතිහාස පොත් පුරාවට ඇත්තේ සතුරන් සිටි බවත් රජවරුන් ඔවුන්ගෙන් අපව ගළවා ගත්තා යන්නත්ය. අපට මතක මෑත ඉතිහාසය තුළද වරක තිස් අවුරුදු යුද්ධය තුල තමිල් - සිංහල ජනයාද, ගංගොඩවිල සෝම හිමියන්ගේ අපවත්වීම ආසන්න කාලයේදී බෞද්ධ - කතෝලික ජනයාද, මෑතකාලීනව මුස්ලිම් ජනයා හා අනෙක් ජනකොටස් අතරද මෙම පසමිතුරුතාවයන් අපට දැකගත හැකි විය. ඉතිං ඉතිහාසයක් පුරා අප කොහේදෝ සිටින සතුරෙකු නසන්නට ලේ කදුළු හෙලු‍වෙමු. එම සතුරා දෙසම බලාසිටි බැවින් අප ඉතිහාය පුරාවට අප දැකිය යුතුව තිබූ බොහෝ දේ නොදැක්කෙමු. රජවරුන්, මැතිඇමතිවරුන්ගෙන් සැදුම්ලත් ප්‍රභූ ස්ථරය ඉතිහාසය පුරාවට කළ කී දෑ අප නොදැක්කෙමු. අවසානයේ ඉතිහාසයම එම රජවරුන්ට සින්න විය.

ඉතිහාසය පුරාවටම අප පෙලන ලද ගැටලු‍, මෙම සදාකාලික සතුරා නිසා සැගව යන ලදී. පාලකයන් මිනිසුන් සූරාකමින් තමන්ගේ සමාජ ස්ථරයේ නැතිනම් පංතියේ සුඛවිහරණය නඩත්තු කරගෙන යන ලද අතර මෙම ව්‍යාජ සතුරාගේ කඩතුරාව ඔවුන්ගේ මෙම හැසිරීම මිනිසුන්ගෙන් වසන් කරන ලද අතර පරම්පරවෙන් පරම්පරාවට මෙම සතුරෙකුගේ භීතිය ඔවුන් උපක්‍රමිකව පවත්වාගෙන එන ලදී. අපද සැබෑ සතුරා හඳුනා නොගෙන අප අපම එකිනෙකා මරාගන්නා ලදී. පසුගිය තිස් අවුරුදු යුද්ධය ඊට හොඳම උදාහරණයයි. ‘දස මහා යෝධයන්’, ‘රණවිරුවන්’ද අප අතරින්ම බිහිකර ගන්නා අතර තරුණයන්ට එවන් වීරයන් වන්නට පොළඹවයි.  ඒ මහා රැවටීම දිගින් දිගටම අනුවර්තනය වෙමින් ඉදිරියට ඇදෙයි.

ත්‍රිමාණ සජීවීකරණ චිත්‍රපට බොහෝ දුරට කුඩා දරුවන් ඉලක්කොට ගනිමින් සරළ තේමාවන් මත ගොඩනැගෙන සිනමා නිර්මාණයන්ය.  The Sea Beastඑවැනි සරළ තේමාවක් රැගත් ජනප්‍රිය දහරාවේ ත්‍රිමාණ සජීවීකරණ චිත්‍රපටයක් වන නමුදු බරපතළ දේශපාලන පණිවිඩයක්ද ඒ තුලන් සමාජය වෙත ගෙන යයි. එය වෙරළබඩ රාජ්‍යයකි. එහි අතීත පුරාවෘත තුල සඳහන් ආකාරයට මුහුදු මෘගයන් හේතුවෙන් කලකට ඉහත එම මුලු‍ රාජ්‍යම අන්තරාවට හා අවදානමට ලක්වී ඇත. එහිදී එවකට රජවරුන්ගේ අනුග්‍රහයෙන් දඩයම්කරුවන් විසින් ජීවිත පරිත්‍යාගයෙන් මෙම මුහුදු මෘගයන් හා සටන් වැද ඔවුන්ව ගැඹුරු මුහුදට පළවා හැර ඇත. එදා සිට මේ දක්වා රාජ්‍යයේ හා ජනතාවගේ ආරක්ෂාව වෙනුවෙන් දඩයම්කරුවන් ගැඹුරු මුහුද පීරමින් මෙම මෘගයන් දඩයම් කරයි. 

මෙම මෘගයන් හා දඩයම්කරුවන් අතර යුද්ධය පිළිබද වීර කතා බිහිවෙයි. කුඩා දරැවන්ට එම වීරයන් පිළිබඳව පාසල්වල උගන්වන අතර සෑම දරුවෙකුගේම සිහිනය වන්නේ කවදා හෝ පොත්වල සිටින ආකාරයේ දඩයම්කරුවෙකු වී මෘගයන් සොයමින් ගැඹුරු මුහුදේ සැරිසැරීමයි. Inevitable යනු පුරාවෘතගත ශ්‍රේෂ්ඨ දඩයම්කරුවන් රැසකට සෙවන දුන් නෞකාවකි. චිත්‍රපටය දිගහැරෙන්නේ එම නෞකාව මුල්කර ගනිමිනි. Maisie යනු මෘගයන් සමග සටනකදී දෙමාපියන් අහිමිව රජු විසින් පවත්වාගෙන යනු ලබන අනාථ නිවාසයක වාසය කරන ගැහැණු දරුවෙකි. ඇය ගැහැණු දරුවෙකු වීමත් කලු‍ ජාතිකයකු වීමත් එක්තරා ආකාරයකට අගනා සංකේතීය භාවිතාවකි. ඇය තම දෙමාපියන් මෙන් දඩයම්කාරියක වීමට තමන් පොත්පත් වලින් ඉගෙනගෙන ඇති වීරයන් සොයා Inevitableනෞකාව වෙත පැමිණෙයි. 

රතු මෘගයා නමින් පොත්පත්වල සඳහන් මුහුදු මෘගයන් අතරින් දැවැන්තම මෘගයා දඩයම් කිරීමට මෙහෙයුමක් මෙම නෞකාව විසින් අරඹයි.  එහිදී Maisie හා  Jacob ට එම මෘගයාගේ සැබෑ ස්වාභාවය දැන ගැනීමටත් ලැබෙයි. පරම්පරා ගණනාවක් දික් ඇදෙන මෙම මිනිසුන් හා මුහුදු මෘගයන් අතර සටන රජවරුන් විසින් ව්‍යාජව නිර්මාණය කරන ලද්දක් බව නිරාවරණය වෙයි. ගැඹුරු මුහුදේ මුහුදු පතුල මෙම දීර්ඝ යුද්ධයේදී මිය ගිය මිනිසුන්ගේ හා මුහුදු මෘගයන්ගේ ඇටසැකිලිවලින් පිරී ඇත. කෙසේද යත් පාලකයන් විසින් නිර්මාණය කරණ ලද යුද්ධ වලින් මියගිය තරුණයන්ගේ ඇටසැකිලිවලින් මේ පොළොවේ සෑම බිම් අඟලක්ම වැසී ඇති ලෙසය.

මෙම ව්‍යාජ සතුරන් සමග යුධවදිමින් සිටි ඉතිහාසය අතහැර අප සැබෑ සතුරන්ට අභිමුඛ විය යුතුව ඇත. මායාමය සතුරෙකුට වසන් වී පාලකයන්ට තමන්ගේ ක්‍රියාවන් සගවා ගන්නට තවදුරටත් ඉඩ ලබා නොදිය යුතුය. මෙන් මෙම යථාර්ථය සමාජය හමුවේ නිරුවත් කළ යුතුව ඇත.