"ඔබ දැන් කරමින් ඉන්න දේ"

ගිනි තබාගෙන මිය ගිය අමෙරිකානු සෙබළාගේ ප්‍රකාශය

පසුගිය පෙබරවාරි 25 වැනිදා අමෙරිකා එක්සත් ජනපද ගුවන් හමුදා සාමාජිකයකු සිය ජීවිත කාලයේ අවසන් වචන අන්තර්ජාලයේ සජීව ලෙස විකාශය කළේය. එහිදී ඔහු ප්‍රකාශ කළේ මෙයයි.

“මගේ නම ආරොන් බුෂ්නෙල්. මම එක්සත් ජනපද ගුවන් හමුදාවේ ක්‍රියාන්විත රාජකාරි සාමාජිකයෙක්. මම තවදුරටත් ජන සංහාරයට හවුල් නොවන්නෙමි. මම දැන් සූදානම් වන්නේ ආන්තික විරෝධතා ක්‍රියාවක නිරත වීමටය. නමුත් පලස්තීනයේ මිනිසුන් සිය යටත් විජිතවාදීන් යටතේ අත්විඳින දේවල් සමඟ සසඳන විට, එය කිසිසේත්ම අන්තයේ ඇති දෙයක් නොවේ. එහෙත්, අපේ පාලක පන්තිය විසින් එය සාමාන්‍ය දෙයක් බවට තීරණය කර ඇත. නිදහස් පලස්තීනයක්! නිදහස් පලස්තීනයක්! නිදහස් පලස්තීනයක්!”‍

ගිනි දල්වා ගත් ආරොන් වේදනාවෙන් කෑ ගසන විට ඔහුට සහාය වීමට ආරක්ෂක නිලධාරියකු ළං වෙද්දී ජුගුප්සාජනක දෙයක් සිදු විය. එනම්, ගිනි අවියක් මානාගෙන පැමිණි තවත් ආරක්ෂකයකු වින්දිතයාට බිම දිගාවන ලෙස විධාන කිරීමය. නමුත්, පළමු නිළධාරියා තම සගයාට දැනුම් දී ඇත්තේ ‘මෙතැනට අවශ්‍ය තුවක්කුවක් නොව ගිනි නිවන උපකරණයක්’ බවය. 

ආරොන් සිය දිවි පිදුමට පැය කීපයකට පෙර තම ෆේස්බුක් මුහුණතේ මෙසේ සටහන් කළේය. 

“අපගෙන් බොහෝ දෙනෙක් අපෙන්ම මෙසේ අසන්නට කැමතිය: වහල්භාවය ඇති කාලයක ජීවත් වනවා නම් මම කරන්නේ කුමක්ද? Jim Crow South ද? නැත්නම් වර්ණභේදවාදයද? මගේ රට ජන සංහාරයක් කරන්නේ නම් මම කරන්නේ  කුමක්ද? උත්තරය තමයි දැන් ඔබ කරමින් ඉන්න දේ”‍

25 හැවිරිදි ආරොන් ජේම්ස් බුෂ්නෙල්, 2020 මැයි මාසයේදී එක්සත් ජනපද ගුවන් හමුදාවට සම්බන්ධව එතැන් සිට තොරතුරු තාක්ෂණ සහ සංවර්ධන (ඔත්තු සේවා) මෙහෙයුම්වල සේවය කර ඇත. 2024 මැයි මාසයේ සිය ගිවිසුම්ගත රාජකාරියෙන් සමුගත් පසුව නිව් හැම්ප්ෂයර් විශ්ව විද්‍යාලයේ තොරතුරු තාක්ෂණ උපාධි අපේක්ෂකයකු ලෙස පාඨමාලාවක් හදාරන්නට ඔහු සුදුසුකම් ලබා සිටියේය. එක් අවස්ථාවකදී ආරොන් සිය හිතවතුන්ට පවසා තිබුණේ එක්සත් ජනපද විශේෂ ඒකකවල සෙබළුන් ගාසා තීරයේ උමං මාර්ග  තුළ ඝාතනවල යෙදෙන බවට තොරතුරු තමන් දන්නා බවය. කෙසේ වෙතත් එක්සත් ජනපද ආරක්ෂක අංශ මෙම චෝදනාව ප්‍රතික්ෂේප කර ඇත. ආරොන්ගේ සිදුවීමෙන් පසුව ප්‍රකාශයක් නිකුත් කරමින් එක්සත් ජනපද ගුවන් හමුදාව ප්‍රකාශ කළේ ඔහු 531 වන බුද්ධි සහාය බලගණයේ සයිබර් ආරක්ෂක මෙහෙයුම් විශේෂඥයෙකු බවයි.

2023 දෙසැම්බර් මාසයේදී ඇට්ලැන්ටාහි ඊශ්‍රායල් කන්සියුලර් කාර්යාලය ඉදිරිපිටදී විරෝධය දක්වමින් කාන්තාවක් සිරුරට ගිනි තබා ගත් අතර ආරක්ෂකයකු විසින් ඇය වහා ප්‍රතිකාරවලට යොමුකිරීම නිසා ඇගේ ජීවිතය ආරක්ෂා විය. පිලිස්සුම් තුවාල සිදුවුවද ඇය කවුරුන්දැයි ප්‍රසිද්ධියට පත්ව නැත.

Jim Crow South යනුවෙන් අදහස් කෙරෙන්නේ එක්සත් ජනපදය කල්ලන්ට එරෙහිව යොදාගත් මර්දන නීතියකි.