'සිවුපා කෘමි පනත'
පෙබරවාරි 4 වැනිදා ලංකාවේ පාලක පන්තිය ඊනියා නිදහස පුරාජේරු සහගත ලෙස සැමරීය. ඒ සැමරුමට සතියකට පෙර සමාජ මාධ්‍ය භාවිතා කර අදහස් ප්‍රකාශනයේ යෙදෙන්නන් දඬුකඳේ ගැසිය හැකි ‘මාර්ගගත ක්‍රමවල සුරක්ෂිතතාව පිළිබඳ පනත’ පාර්ලිමේන්තුවේ සම්මත විය.
ඊට සති තුනකට පෙර සමාජ ක්‍රියාකාරීන් හා අරගලකාරී ජනයා ත්‍රස්තවාදීන් ලෙස හංවඩු ගැසිය හැකි ‘ත්‍රස්ත විරෝධී පනත් කෙටුම්පත’ පාර්ලිමේන්තුවේ සභාගත කළ ආණ්ඩුව නිදහස සැමරුවේ මාධ්‍ය හීලෑ කරන ‘විකාශන නියාමන කොමිෂන් පනත’ සකස් කරන අතර ය. ‘මේ සමරන්නේ කාගේ නිදහසක්ද?’ යන්න වටහා ගැනීමට මේවා දෙස බලන අයෙකුට කිසිදු විශේෂ බුද්ධියක් අවශ්‍ය නොවේ. මේ සියල්ල කරන්නේ ‘ජාතික ආරක්ෂාවේ’ නාමයෙනි. ඒ ආරක්ෂාව කවර පන්තියක ආරක්ෂාවදැයි ලංකාවේ ජනතාවට අමුතුවෙන් පැහැදිලි කළ යුතු නැත.
ඊනියා නිදහස් සැමරුම වෙනුවෙන් මෙවර ‘රළ‘ මුල් පිටුවට එක් කෙරෙන්නේ මැලේසියානු කවි සිසිල් රාජේන්ද්‍රගේ කවියකි. ලංකාවද සිංගප්පූරුවේ හා මැලේසියාවේ මගම යා යුතු යැයි කියන නව ලිබරල් කේවට්ටයන්ට මේ කවිය වැදගත් වනු ඇත. සිසිල් රාජේන්ද්‍රගේ ‘සිවුපා - කෘමි පනත‘ නම් මෙම කවිය සිංහල භාෂාවට පරිවර්තනය කරන ලද්දේ එස්. ජී. පුංචිහේවා විසිනි. ජාතික ආරක්ෂාවේ නාමයෙන් එන මර්දන පනත් සහ නිදහස අතර සම්බන්ධය මෙම කවිය මනාව පරාවර්තනය කරයි.
සිවුපා කෘමි පනත
ඉතින් අන්තිමේ දී පූර්ණ
ජාතික ආරක්ෂාව නැතුව පුළුවන්ද,
සපාද, අපාද, සතුන් පිළිබඳ
හදිසි පාලනය හා විනය පනත පැනැවිණි.
මේ නව පනත අනුව
මී-ගව-එළු සිවුපාවුන්ට
තිදෙනෙකුට වැඩියෙන් රංචු ගැසී
තණකොළ කෑම තහනම් ය.
කුරුල්ලන් රෑන් වශයෙන් පියෑඹීම ද
මී මැස්සන් කැටි ගැසීම ද
නීති විරෝධී රංචු ගැසීම වන්නේය.
සැලසුම් අනුමත නො කොට සාදා ඇති
සියලු දෙබර වද වලින්
වහා ඉවත් වන ලෙස නියෝග නිකුත් වී.
ඔවුනගේ ගෙවල්, කඩාකප්පල්කාරී ලෙස
පෞද්ගලික දේපළ කෙරෙහි
මැදිහත්වීම් ලෙස සැළැකිණි.
අදාළ අමාත්‍යංශයෙන් විකාශන බලපත්‍රයක් නැතිව
වඳුරන් හා මයිනන් විසින්
ඔවුන්ගේ ගෝසාකාරී පනිවුඩ
නිකුත් කිරීම අත් හිටුවිය යුතුය.
ජාතියේ හදිසි අවස්ථාවන් හි දී
අනුමත නොකළ ප්‍රකාශන හා විකාශන
භයානක තර්ජනයකි.
එසේම, කොට්ටෝරුවන්ට
මින්පසු තුරු කඳන්වල
මෝර්ස් හෝඩිය කොටමින්
පනිවුඩ යැවීම සපුරා තහනම් වෙයි.
අදාල බලධරයන් විසින්
සියලු සංනිවේදනයෝ මනා පිරික්සුමකට
ගොදුරු කැරෙති.
ගේ කුරුල්ලන් කට කතා පැතිරවීම
ගැන අත් අඩංගුවට ගෙන ඇත.
කුමන්ත්‍රණ කිරීම ගැන සැක පිට
සියලු බළල්ලු රාත්‍රී නවයෙන් පසු
නිවෙස් වලට වී සිටීමේ නියෝග ලදහ.
සිය ශබ්ද විකාශන නවත්වන ලෙස
රැහැයියන්ටත්, පළඟැටියන්ටත්
නොතීසි නිකුත් කර ඇත!
තාරාවන් ‘ක්වැක්‘ ගෑම හෝ
කළුකුමන් ‘ගොක්‘ ගෑම හෝ
තහනම් කාලය තුළදී සීමා කැරෙයි.
ඇල්සේෂන් හෝ පදඩ බල්ලන් හෝ
සිය කටවල් පාලනය කරගත යුතුය.
ආරක්ෂක හේතු මත හමුදා නිල ඇඳුමට
සමාන හෝ වෙනත් නිල ඇඳුමක් හෝ
භාවිතය තහනම් ය.
එහෙයින් පෙන්ග්වින්ලාටත්, සීබ්‍රාවන්ටත්
නීතියෙන් අනුමත නොකළ ඇඳුම්
ඇඳීම තහනම් වෙයි.
මුවන් ගෝනුන් විසින් සිය අංතට්ටු
ළඟම ඇති පොලීසියට බාර දිය යුතුය.
කොටියන් ඇතුළු මාංස භක්ෂකයන්
නිය, දත් වැනි මාරක ආයුධ
සඟවාගෙන සිටීම නිසා
කෙලින් ම සිර අඩස්සියට ගෙන ඇත.
හතර වැනි වගන්තියේ දෙවැනි ඡේදයේ
‘බී‘ උප වගන්තිය අනුව අලියන් විසින්
හොඬ වැලින් හා පසු පසින් නාද නිකුත් කිරීම
සවස හයේ සිට උදේ හය දක්වා තහනම් ය!
එම හඬ වෙඩි හඬකැ යි රැවටී
කලබල ඇති වීමට ඉඩ ඇති හෙයිනි.
මේ නීතිය නිසි පරිදි ගැසට් කරන ලදුව
මසකට පසු සියලු කුරුල්ලෝ
කෘමි සත්තු දකුණට ද
සිවුපාවෝ උතුරට ද සංක්‍රමණය වූහ.
දැන් මුළු වනය නීතිය අනුව ගොළු ය.
එහෙත් බිය කරු ය.
ඉතින් දැන් පූර්ණ ජාතික ආරක්ෂාව පවතින්නේ ය!
පරිවර්තනය - එස්. ජී. පුංචිහේවා
Comments
Post a Comment