උපන් බිම අහිමි ව පලායනවුන්ගේ කතාව - NOWHERE

සරණාගතයන් පිළිබද ගැටලු‍ව අපට විටින් විට අසන්නට ලැබෙනවා. ගොඩක් වෙලාවට විදෙස් පුවත් වල කොහේ හෝ රටක යුද්ධයක් හෝ සිවිල් අරගලයක් නිසා මෙපමණ පිරිසක් සරණාගත භාවයට පත්වුණ බවට තත්පර කිහිපයක ප්‍රවෘත්තියක් බවට එය පත්වෙයි. සරණාගත ගැටලු‍ව අපට නුපුරුදු ම කරුණක් නොවෙයි. තිස්වසරක් පුරා දිග ඇදුණු යුධ සමයේ දහස් ගණනක් තමිල් ජනතාවට සරණාගතයන් ලෙස විදෙස් ගතවීමට සහ වසර ගණනාවක් මෙරට සරණාගත කඳවුරුවලට කොටුවී සිටින්නට සිදුවිය. එසේම අසූව දශකය අගභාගේ තරුණ අරගලයට එරෙහිව දියත්වූ භීෂණය හේතුවෙන් සහ ඉන් පසුව පවතින ආණ්ඩුවල විවිධ ව්‍යාපෘතීන්ට එරෙහිව කටයුතු කළ සහ ඒවායේ යථාව හෙළිදරව් කළ දේශපාලන ක්‍රියාකාරිකයන්, මාධ්‍යවේදීන් ඇතුලු‍ විවිධ පිරිස් වලට තම ජීවිතය වෙනුවෙන් සරණාගත භාවයට පත්ව වෙනත් රටවල් වෙත පලායාමට සිදු විය. නමුත් මෙම සරණාගත ගැටලු‍ව ලෝක මට්ටමින් අප සිතනවාට හා අප එයට සංවේදී වනවාට වඩා ඉතා බරතපතළ මානව ඛේදවාචකයකි.

සිරියාව, යුක්‍රේනය වැනි රටවල සරණාගත ගැටලු‍වක් ඇතිවීම ගැන අපට යම් අදහසක් ඇතිවා මෙන්ම ඒ සම්බන්ධයෙන් මාධ්‍යයන්ගෙන්ද වාර්තා කරනු ලබයි. නමුත් පසුගිය වසරක පමණ කාලය තුළ කොංගෝ ජනරජයේ මිලියනයකට ආසන්න පිරිසක් සරණාගත භාවයට පත්වීම, සෝමාලියාවේ ලක්ෂ 8ක පමණ පිරිසක් සරණාගත භාවයට පත්වීම වැනි සිදුවීම් පිළිබඳ අපට අවම දැනුවත් භාවයක් හෝ නොතිබුණි. යම් මිනිසෙකුට තමන් උපන් භූමිය හා තමන්ගේ සියලු‍ සබඳතා අතහැර තම ජීවිතය වෙනුවෙන් පලායාමට සිදුවීම අපට ජීවිතයේ මුහුණ දීමට සිදුවන අභාග්‍යය සම්පන්න ම සිදුවීමකි. මෙලෙස පලායන්නන් සමූහ වශයෙන් ගංගා මුහුදවල්වල ගිලී මියයාම, තමන් පලායන රටේ හෝ කණ්ඩායමේ පිරිස් වෙතින් දේශසීමා ආසන්නයේ ඝාතනයට ලක්වීම වැනි සිදුවීම් නිරන්තරයෙන් අසන්නට ලැබෙයි. කලින් කලට එලෙස මියගිය අසරණයන්ගේ ඡායාරූප සමාජ මාධ්‍ය තුළ පැතිරෙයි. සියල්ලෝම කම්පා වෙයි. නැවත උපදින ආත්මයක මෙවැනි මරණයක් අත් නොවේවා ප්‍රාර්ථනා කොට සියල්ල අවසන් වෙයි.

ස්පාඤ්ඤය ඇතුලු‍ යුරෝපයේ රටවල් ගණනාවක අත්තනෝමතික පාලන රෙජීමයකට යටත් වී ඉතා අදුරු යුගයක් පසුකරමින් සිටී. මිනිසුන් ඉන්ධන ලබාගැනීමට භාජන රැගෙන පෝලිම් වල දුක්විදින දර්ශන නරඹන විට මෙම ස්පාඥ්ඥය නිර්මාණ කරුවාට ප්‍රබන්ධවූ ඇතැම් සිදුවීම් අප සැබෑ ලෙසම අත්විදින ලද බව සිහි වෙයි. කෙසේ හෝ ආහාර හිගය ඇතුළු දරිද්‍රතාවයෙන් ජනතාව පීඩාවිදින අතරම දරුවන් පැහැර ගනිමින් සහ ඝාතනය කරමින් කුඩා දරුවන් පවුල් වලින් වෙන් කිරීමේ ක්‍රියාමාර්ගයක් ද පාලක රෙජීමය විසින් ක්‍රියාත්මක කරමින් සිටී. කතාව ආරම්භවන්නේ ‘ඵස්’ ඇගේ සැමියා සමග කන්ටේනර් පෙට්ටියක සැඟවී රටින් පලායාමට සූදානම්වන දර්ශනයත් සමගයි.

NOWHERE චිත්‍රපටය සරණාගත ගැටලු‍ව අමන්ත්‍රණය කිරීමට නිර්මාණයවූවක් නො වූවද සම්පූර්ණ චිත්‍රපටය ම දිගහැරෙන්නේ ගැබිණියක් වන ‘ඵස්’ පාලක රෙජීමයෙන් බෙරී සරණාගතයකුව වෙනත් භූමියක් සොයා යන ගමනත්, එහිදී ඇය ඇයගේත් අලු‍ත උපන් සිය දියණියගේත් ජීවිතය බේරා ගැනීමට දරණ විස්මිත වෑයමයි. සැබෑ ලෝකයේ සිදුවනවා මෙන්ම මෙම පිරිස් රටින් පලායාමට පහසුකම් සපයාගන්නේ එරට තමන් සතු සියලු‍ වත්කම් යොදා ගනිමින් වන අතර මෙය අසාර්ථක වුවහොත් වෙන විකල්ප පැවැත්මක් ඔවුන්ට නොමැත. 

‘ඵස්’ සහ සැමියාට කන්ටේනර් පෙට්ටි දෙකක වෙන වෙනම ගමන් කිරීමට සිදුවන අතර ‘ඵස්’ ගමන් කළ කන්ටේනරය රෙජීමයේ ආරක්ෂක අංශවලට හසුවන අතර ඔවුන් එහි සිටි සියලු‍ දෙනා ඝාතනය කරනු ලබයි. ඇය පමණක් සැඟවී ජීවිතය ගලවා ගැනීමට සමත් වෙයි. පසුව ඇය පමණක් සිටින කන්ටේනර් පෙට්ටිය නැව්ගත කරන අතර අතර මගදී ඇතිවන කුණාටුවක් හේතුවෙන් කන්ටේනර් පෙට්ටිය මුහුදට වැටෙයි. කන්ටේනර් පෙට්ටිය වෙත ක්‍රම ක්‍රමයෙන් ජලය කාන්දුවන අතර ඇය ඒ තුළ ම තම දියණිය ප්‍රසූත කරයි. තම සැමියා නොමැතිව කිසිවක් කර ගැනීමට නොහැකිව සිටි ඇය මහසයුර මැද කන්ටේනර් පෙට්ටියක තුළ සිරවී තමන්ගේත් දරුවාගේත් ජීවිතය වෙනුවෙන් සටන් කරන්නට සිදු වෙයි. ඇයගේ සටනින් ප්‍රතිඵලයක් ඇත් ද යන්න දැන ගැනීමට චිත්‍රපටය නැරඹීමට සිදුවෙයි.

චිත්‍රපටය සිනමාත්මක බවින් ඉහළ වන අතර චිත්‍රපටයේ ධාවන කාලයෙන් වැඩි කොටසක ‘ඵස්’ හුදෙකලාව කන්ටේනරය තුළ සිරවී සිටින දර්ශන දැක්වෙන නමුත් චිත්‍රපට පුරා කිසිදු විටෙක ඒකාකාරී බවක් නො දැනෙයි. ඵස් ගේ චරිතය නිරූපණය කරන ්බබ් ක්‍්එසකකදගේ රංගනය ඉතා ප්‍රශස්ත මට්ටමකින් මෙම චිත්‍රපටය තුළ දැක ගත හැකිය. භැඑකෙසං තුළ ප්‍රදර්ශනය වන මෙම චිත්‍රපටය ද සිනමාව සිනමා ශාලාවලින් ඔබ්බට වෙනත් මාදිලීන් වෙත අවතීර්ණ වීම පිළිබඳ හදුනාගැනීමක් වෙයි. චිත්‍රපටයේ නිශ්පාදකයන්ද ඒ පිළිබඳ අවබෝධයකින් චිත්‍රපටයේ දර්ශන පෙළගස්වා ඇති ආකාරය හඳුනාගත හැකිය.