රස්තියාදුව
දමිතා දේශපාලන ක්‍රියාකාරිනියක ලෙස කැපී පෙනෙන්නේ මාර්තු මසදී ආරම්භ වූ ජන අරගලයේදී පමණක් නොවේ. ඇය වේදිකාවේදී මෙන්ම සිනමාවේදී නිරූපණය කළ භූමිකා හුදු නිළියකගේ සීමාව ඉක්මවා යන්නක්. ළමා කාලයේදීම රංගනයට පිවිසි දමිතා ‘දඬුබස්නාමානය’ වැනි ටෙලි නිර්මාණයක, ‘මී හරකා’ වැනි සිනමා පටයක නිරූපණය කළ චරිතවල කූටප්‍රාප්තිය ‘සුළං කිරිල්ලී’ සිනමා පටයේදී දක්නට ලැබුණා. කෙසේවෙතත් දමිතාගේ දේශපාලන භූමිකාව හෙළි වූයේ ගාලු මුවදොර අරගල භූමියේ ඇය කළ මැදිහත්වීමේදීය.
අරගලකරුවන් පැහැර ගෙන යාමේ ක්‍රමයම අනුගමනය කරමින් හදිසියේ ඇය ජීප් රථයකට නංවා ගෙන ගියත් ඇය ගෙන ගියේ කොතැනටදැයි පැය ගණනක් යනතුරු හෙළි වූයේ නෑ. මේ ආකාරයෙන් කලාකාරිනියක්, මේ රටේ ජනතා අරමුණු වෙනුවෙන් සටන් කළ අරගලයේ සාමාජිකාවක් අත්අඩංගුවට ගැනීමෙන් හෙළිවන්නේ රනිල් වික්‍රමසිංහ-රාජපක්ෂ ආණ්ඩුව දේශපාලන නිදහස සහ විරෝධය සම්බන්ධයෙන් ප්‍රතිචාර දක්වන්නේ මර්දනයෙන් පමණක් බවයි.
අසංක සායක්කාරගේ 'අයියමළෝ' දේශපාලන ප්‍රහසනය පසුගියදා කොළඹ, එල්පින්ස්ටන් රඟහලේදී වේදිකාගත කෙරුණා.
නව රංග ක්‍රම භාවිතයට ගනිමින්, විශේෂයෙන් බර්ටොල්ට් බ්‍රෙෂ්ට් නාට්‍යකරුවාගේ රංගවේදය මෙන්ම ෆෝරම් තියටර් උපක්‍රම අනුගමනය කරමින් ඔහු සමකාලීන දේශපාලනයේ නිරූපණයන් රංගගත කරනවා.
අපේ කාලයේ නාට්‍යකරුවන් අතර වේදිකා රංගය යාවත්කාලීන කරන නිර්මාණකරුවෙක් ලෙස සායා, පසුගිය කාලයේ ආරම්භ වූ ජන අරගලයේ ක්‍රියාකාරිකයකු ලෙසත් අරගලය වේදිකාවට ගෙන ඒමේ කාර්යයක් ඉටු කරමින් සිටිනවා. ‘අයියමළෝ‘ නාට්‍ය කණ්ඩායමේ සාමුහික මෙම ප්‍රයත්නය අපූර්ව නාට්‍ය අත්දැකීමක් වෙත අපව කැඳවා යනවා.
ඉදිරියේදී ‘අයියමළෝ‘ රටපුරා සාමාන්‍ය රංග ශාලාවල මෙන්ම පොදු ජන අවකාශ තුළට ගෙන යාමට සායා ඇතුලු කණ්ඩායම සූදානම් බවද ප්‍රකාශ කෙරුණා.
---------------------------
සිනමා කැමරාශිල්පී ඩොනල්ඩ් කරුනාරත්නගේ අභාවය වෙනුවෙන් කලාකරුවන් පිරිසක් විසින් කොළඹ, නිදහස් චතුරශ්‍රයේදී ස්මරණ අවස්ථාවක් සංවිධානය කොට එම අවස්ථාවේ ‘අහස් ගව්ව‘ සිනමා කෘතිය ප්‍රදර්ශනය කෙරුණා.
ධර්මසේන පතිරාජගේ විප්ලවීය සිනමා කාර්යයක් ලෙස 1974 තිරගත වූ “අහස්ගව්ව” සිනමා පටයට දායක වෙමින් වම් ඉවුරේ සිනමාව වෙනුවෙන් තීරණාත්මක දායකත්වයක් ලබාදුන් ඩොනල්ඩ් ඉන්පසුවත් පතිරාජ, ලෙස්ටර්, සුමිත්‍රා පීරිස්, වසන්ත ඔබේසේකර, අමරනාත් ජයතිලක, ෂෙල්ටන් පයාගල ආදී නිර්මාණකරුවන්ගේ අතින් නිමැවුනු සිනමා පට ගණනාවක් සිය කැමරාවෙන් ප්‍රතිනිර්මාණය කිරිමට දායක වුනා. ඒ ආකාරයෙන් ඔහු විසින් කැමරාකරණය කළ, පොන්මනී, බඹරු ඇවිත්, අහසින් පොළවට, පාරදිගේ, දඩයම, කරුමක්කාරයෝ, කලියුගය, ක්‍රිස්තු චරිතය, ගඟ අද්දර, මලට නොඑන බඹරු, සහරාවේ සිහිනය, ගොළු මුහුදේ කුණාටුවක්, සාගර ජලය මදි හැඬුවා, සක්කාරං ඇතුළු ලාංකීය සිනමා ඉතිහාසය තුළ අද්විතීය නිර්මාණ සටහන් කළ හැකියි.
සිනමා කැමරාවකින් කිසියම් ජීවන අත්දැකීම් අධ්‍යක්ෂවරයාගේ කෘතියක් ලෙස ප්‍රතිනිර්මාණය කිරීමේදී සිනමා කැමරා ශිල්පියා විසින් අදාළ රූපයේ කෝණය, ගැඹුර හා ආලෝක තත්වය භාවිත කරමින් ස්වීය වූ නිර්මාණ කාර්යයක නිරත වේ.
මෙම කාර්යයේදී ඩොනල්ඩ් විසින් දැක්වූ විශේෂත්වය එකී කෘතිවල සාර්ථකත්වයට හේතු වී ඇති බවට කිසිදු සැකයක් නෑ.
පසුකාලයකදී ඇමරිකාවේ පදිංචියට ගිය ඩොනල්ඩ් එහිදී ‘අහස් ගව්ව‘ නිර්මාණයේ ඉදිරි පියවරක් නිර්මාණය කිරීම වෙනුවෙන් පතිරාජ දැරූ උත්සාහයක් වෙනුවෙන්ද සිය දායකත්වය දීමට සූදානම්ව සිටි බව අප්‍රකට කාරනයක්. පතිරාජ අභාවයට පත් වූ නිසා එම කාර්ය අතරමග නතර වූ නමුත් එවැනි නිර්මාණකාරියක අභියෝගය, ලාංකීය සිනමාකරුවන් හමුවේ වෙයි.
Comments
Post a Comment