‘සුලුතරවීමේ වරද’ ඔස්සේ ජීවිතය දෙස බැලීම - Funny Boy

 

Funny Boy - Young Arjie

 අප ඕනෑම සිදුවීමක් හෝ කාරණයක් දෙස බලනුයේ අප ජීවත්වන සමාජ ආර්ථික පසුබිමත් සමගයි. මෙරට තිස් වසරක යුද්ධය දකුණේ සිංහල සමාජයේ වෙසෙන්නෙක් දුටුවේ විටින් විට බස් රථවල පුපුරා යන බෝම්බ වලින්, මායිම් ගම්මාන වල වැසියන් එල්ටීටීඊ සංවිධානය විසින් ඝාතනය කිරීම පිළබඳ පුවත් වැනි දේ තුළින්ය. ඒ අනුව නිවසින් රැකියාවට ගිය තම මව්පියන් දූදරුවන් නිවසට එනතුරු ඔවුනට අනතුරක් වේදැයි තැවෙමින් පීඩාවිදිමින් සිටි මිනිසුන්ට කුමන හෝ ලෙසකට යුද්ධය අවසන් වීම ආස්වාදයකි.

යුද්ධයේ අවසන් සමයේ සතුරු ඉලක්ක වෙත යොමු කෙරෙන මල්ටි බැරල් ප්‍රහාර දෙස අප බලා සිටියේ අලුත් අවුරුද්දට අහස් කූරු යවා ඒ දෙස බලා සිටිනා ආකාරයටය. නමුත් ඒ අහස් කූරු උතුරේ පතිතවූයේ රාක්ෂයන් විලසටය. සදාකාලික වේදනාවක් වෛරයක් අලුයට සඟවමින් ඒ යක්ෂයන් සියල්ල දවා හළු කරන ලදී. කොළඹ ඉහළ ප්‍රාන්තික තමිල් යෞවනයකු මෙම වාර්ගික අර්බුදයට අභිමුඛ වන ආකාරය පිළිබඳ කථාවය  Funny Boy.

චිත්‍රපටය මූලිකව ‘ආර්ජි’ නම් දරුවකු තම වෙනස් ලිංගික ස්වාභාවය වටහා ගනිමින් යොවුන් වියට එළඹෙන ආකාරයත් එම වෙනස් ස්වාභාවය ඔහුගේ පවුල භාරගන්නා ආකාරයත් විදහා දැක්වෙන කථාවකි. මෙය ශ්‍යාම් සෙල්වදුරෙයිගේ  Funny Boy නවකතාව ඇසුරින් නිර්මාණයවී ඇත. සුලුතර ජාතික අනන්‍යතාව මෙන්ම ස්ත්‍රී-පුරුෂ ලෙස නියම කළ සමාජභාවයෙන් වෙනස්වීම හේතුවෙන් ආර්ජි මුහුණ දෙන වෙනස්කොට සැළකීම් ඇතුළු දුෂ්කරතා මෙම කතා පුවතින් නිරූපණය කරයි. සුළුතර ලිංගික අනන්‍යතාවක් සහ ජාතික අනන්‍යතාවක් සහිත යෞවනයෙකු මුහුණ දෙන අභියෝගයන් කෙබඳු වේද?

බහුතර සිංහල ප්‍රජාව වෙතින් පීඩා විඳින නාගරික තමිල් ප්‍රජාවක් තමන් අතර සිටින සුලුතර ලිංගික අනන්‍යතාවක් සහිත පිරිස්වල අයිතීන් හා අනන්‍යතාව පිළිනොගැනීම මෙහි නිරූපනය වේ. මෙහිදී එක් අතකින් සිංහල මහජාතික ජාතිවාදයත් එයට ප්‍රතිචාර ලෙස ගොඩනැගෙන සුලු ජාතික ජාතිවාදය පදනම් කරගත් උතුරේ තරුණයන්ගේ සන්නද්ධ අරගලයත් ඒ දෙස විවිධ ප්‍රවේශයන්ගේ සිට ප්‍රතිචාර දක්වන කොළඹ ඉහළ පාන්තික තමිල් පවුලකුත් අපට හමුවේ. මෙහි අපට හමුවන එක් එක් චරිත මෙම වාතාවරණය කියවා ගන්නා අකාරයත් ඊට ප්‍රතිචාර දක්වන අකාරයත් එකිනෙකට වෙනස් වෙයි.

මෙහිදී ප්‍රධාන චරිතය වන ආර්ජි සහ ඔහුගේ නැන්දා වන රාධා යන අය අපට එක් වර්ගීකරණයක් තුළට දැමිය හැක. ඔවුන් යම් ආකාරයක ලිබරල් අදහසකින් සාම්ප්‍රදායික අදහස් ප්‍රතික්ෂේප කරණ තැනැත්තන්ය. ඔවුන්ට තම ජාතික අනන්‍යතාව එතරම් අදාළ කරුණක් නොවෙයි. නමුත් ඔවුනටද තම දෙමාපියන්ගෙන් ලද අනන්‍යතාව මත වෙනස්කම් වලට මුහුණ දීමට සිදුවෙයි. නමුත් ඔවුන් දරණ් ස්ථාවරයන් අනුව උතුරේ සන්නද්ධ අරගලය වෙත ආකර්ෂණය නොවන බව පැහැදිළිය. චිත්‍රපටයේ මෙම ප්‍රධාන චරිත අතර ඇතිවන එක් දෙබසක හෝ මෙම සන්නද්ධ අරගලය ගැන සදහන් නොවෙයි. නමුත් ජාතිවාදය සියුම් හුයක් ලෙස අප සියලු දෙනා තුළම පවතින අතර ඇතැම් තැනක එය මතුව එයි. දුම්රියේදී තමිල් ජනයා ඝාතනය කෙරෙන ආකාරය දුටු රාධා, ප්‍රතිචාර ලෙස තම පෙම්වතාගේ සිංහල අනන්‍යතාව ප්‍රශ්න කරයි. මේ අකාරයටම ආර්ජි සිය සම්බන්ධය නැවැත්වීමට යෝජනා කළ විට ආර්ජිගේ පෙම්වතා හැසිරෙන්නේද ජාතික අනන්‍යතාව ප්‍රශ්න කරමිනි. ඔහු ආර්ජිගේ තමිල් අනන්‍යතාව අපහාසයට ලක් කරමින් හැසිරෙයි. කෙසේ නමුත් අවසානය දක්වා ආර්ජිට ජාතික පීඩනය අභිමුඛ වන්නේ සාපේක්ෂව අඩු ප්‍රචණ්ඩත්වයකිනි. එය බොහෝ විට පාසලේ ඇතැම් සිසුන්ගේ අපහාසයන්ට හා හිරිහැරයන්ට සීමා වෙයි.

ආර්ජිගේ පියා ධනවත් ව්‍යාපාරිකයකු වන අතර ඔහු උතුරේ සන්නද්ධ අරගලයට අකමැති වන්නේ එමගින් එකිනෙකා පෝෂණය කරගනිමින් වර්ධනය වන මහජාතික ජාතිවාදය හරහා තම ව්‍යාපාරයන්ට සිදුවන හානිය නිසාය. ඔහු තමිල් ජනයාට වන අසාධාරණයන් වැනි කරුණු පිළිබඳව එතරම් සංවේදී නොවේ. ඔහුට අවශ්‍ය වන්නේ අනන්‍යතා මත පවතින පසමිතුරුකම් යටපත්කර ව්‍යාජ සාමාකාමී වාතාවරණයක් පවත්වා ගනිමින් සිය ව්‍යාපාර ඉලක්ක සාර්ථක කර ගැනීමටය. වරක තමන්ගේ වෙළඳාමට හානි වේයැයි තමන් සමග තමිල් භාෂාවෙන් කථා නොකරන ලෙස ආර්ජිලාට පවසන තමිල් ජාතික මස් වෙළෙන්දාද මෙම අර්බුදය කියවා ගන්නේ ආර්ජිගේ පියා මෙන්ම තම වාණිජ අරමුණු මූලික කරගෙනය.

ආර්ජිගේ ආච්චි අම්මා නිරූපණය කරනුයේ කොළඹ ආශ්‍රිත සාම්ප්‍රදායික ඉහළ පැලැන්තියේ කාන්තාවකගේ භූමිකාවයි. ඇය තම පවුල කුලය ජාතිය වැනි කරුණු මත උඩගුව ජීවත්වන තැනැත්තියකි. ඇයට ඇති ගැටලුව වන්නේ මෙම ජාතිවාදී ප්‍රවණතාවන් තුළ තමන්ව තමන් ඇසුරු කරණ සමාජය තුළ යම් අකාරයක දෙවන පෙළ පුරවැසියන්ගේ ස්වාභාවයකට ඇද වැටීමයි. එහිදී ඇය උතුරේ අරගලයට පක්ෂපාත වන්නේ එමගින් තමන්ට අනියමින් වෙනස් කොට සැළකූ පිරිස් වෙත රිදවීමේ අරමුණෙන්ය.

මෙම චිත්‍රපටය තුළ සාතිශය බහුතරයක්වූ සාමාන්‍ය දෙමළ ජනයා මෙම අර්බුදය හමුවේ පත්ව ඇති තත්වය පෙන්නුම් කරන වෙනත් ලෙසකට උතුරේ තමිල් තරුණයන්ගේ පණිවිඩය මෙම චිත්‍රපටය තුළට රැගෙන එන පණිවිඩකරුවා වන්නේ ජෙගන්ය. මෙම වාර්ගික අර්බුදය හමුවේ වැඩිවශයෙන් පීඩාවට හා අසරණභාවයට පත්වන්නේ ඔවුන්ය. ආර්ජිලා ඉහළ ප්‍රාන්තික නිවෙස්වල ආරක්ෂිතව වෙසෙන කල ජෙගන්ට තම බෝඩිමෙන් පවා පිටවෙන්නට සිදුවන්නේ තමිල් අනන්‍යතාව හේතුවෙනි. මෙහිදී ඔහු නවාතැන් ගැනීමට ආර්ජිගේ නිවසට පැමිණි අවස්ථාවේ ජෙගන් හා ආර්ජිගේ මව අතර වරෙක ඇතිවන දෙබස වැදගත්ය. මෙහිදී එල්ටීටීඊ සංවිධානයේ ක්‍රියාකාරකම් නිසා විපතට පත්වන සාමාන්‍ය ජනයා ගැන ඔහු පවසන අතර නමුත් එම අවස්ථාවේ එල්ටීටීඊ සංවිධානය හැර වෙනත් විකල්පයක් ඔවුනට හමු නොවේ. චිත්‍රපටය අවසානයේ ජෙගන් එල්ටීටීඊ සංවිධානයට බැඳීමට නැවත යාපනයට පිටව යයි. එම බසයේ ඔහු අසළ සිටින වෙනත් තමිල් ජාතික මගියෙක් ඔහුට පවසන්නේ ඔහු වැනි තරුණයන් අරගලයට අවශ්‍ය බවයි. ඒ අනුව මහාජාතික ජාතිවාදය විසින් තමිල් ජනයා සමස්ථයක් ලෙස තමිල් ජාතිවාදී දේශපාලන ව්‍යාපාර වෙත තල්ලු කිරීම පිළිබිඹු කෙරේ.

මෙහිදී වැදගත්ම කාරණයක් වන්නේ ජෙගන් හෝ ආර්ජිගේ මව වැනි තමිල් ජනතාවට වන අසාධාරණයට එරෙහි විය යුතු යැයි සිතන නමුත් එල්ටීටීඊ සංවිධානයේ ක්‍රියාමාර්ගද අනුමත නොකරන පිරිස් සංවිධානය කිරීමට දේශපාලන ව්‍යාපාරයක් නොවීමයි. එහි ප්‍රතිඵලය වන්නේ ඔවුන් සියලු දෙනා ජාතිවාදී දේශපාලන ප්‍රවාහයන්ට ගොදුරුවීමයි. මෙහිදී සිංහල සමාජය නියෝජනය කරණ, මතුව එමින් පවතින ජාතිවාදයට එරෙහිවන රාධාගේ පෙම්වතා, ආර්ජිගේ පෙම්වතා හෝ ආර්ජිලාගේ පවුල තම ජීවිත පවා අනතුරට පත්කරමින් රැකගන්නා අසල්වැසි පෙරේරාගේ පවුලේ සාමාජිකයන් ස්ථානගත වන්නේ කොතැනද? සාමාජීය ජීවිතය තුළ ප්‍රගතිශීලි නියෝජනයකට හිමිකම් කියන ඔවුන් දේශපාලනය තුළ නරඹන්නන් පමණක් බවට පත්වෙයි. මෙම සියලු පිරිස් ජාතිවාදී දේශපාලනයට මෙන්ම ජාතිවාදය ව්‍යාපාරික අරමුණ වෙනුවෙන් භාවිතකරන තත්වය අනාවරණය වේ. මෙහි පවතින තත්වය වෙනස් කිරීමේ සමාජ ක්‍රියාකාරිත්වයක් පිළිබඳ ප්‍රේක්ෂාගාරයට දැනවීමක් නැත. ඛේදවාචකයක් වෙත ගමන් කරනු බලා සිටිනවා හැර කරන්නට කිසිත් නොමැති අසරණ වාතාවරණයකට බොහෝ දෙනෙක් පත්ව ඇති බව චිත්‍රපටයේ නිරූපණයයි.

මෙවැනි අවස්ථාවලදී ලොව බොහෝ අත්දැකීම්වලදී දක්නට ලැබෙන ආකාරයෙන් ප්‍රගතිශීලීන්, වාමාංශික ව්‍යාපාර මෙම ජාතිවාදී දේශපාලනයට එරෙහිව සියලු බලවේගයන් ගොනුකරමින් ක්‍රියාකාරීවෙයි. නමුත් පවතින ඛේදවාචකයෙන් ජීවිත හා දේපළ අහිමි කරමින් ඉතිරි කරන මිනිස් අවශ්‍යතාවයේ අවකාශය වෙත කඩාවැදී එම දේශපාලන දිශානතිය වෙනස් කිරීමට හැකි වාමාංශික ව්‍යාපාරයක් අප සතුව නොතිබිණි. එහි ප්‍රතිඵලය වූයේ ජාතික ප්‍රජාවන් දෙකෙහිම පහළ පාන්තික තරුණයන් හමුදා සාමාජිකයින් ලෙසින් හෝ එල්ටීටීඊ සාමාජිකයන් ලෙස එකිනෙකාට එරෙහිව යුධ වැදීමයි.

Funny Boy චිත්‍රපටය තුළ ජාතික ප්‍රශ්නය හමුවේ තමිල් ජනතාව මුහුණ දුන් යථාර්ථය නිසි පරිදි නිරූපණය නොවන බවට විවේචන පවතී. එය සත්‍යයක් වන නමුත් සිනමා නිර්මාණයක් ලෙසින් එයට එම විවේචනය වැරදි සහගතය, මන්දයත් මෙහිදී මුලු සිනමාපටයම දිග හැරෙන්නේ කොළඹ ඉහළ ප්‍රාන්තික යෞවනයෙකු අත්විදින අත්දැකීම් වටා වන අතර ඔහුගේ අත්දැකීම් තුළ සමස්ථ චිත්‍රයක් ලෙස එම වකවානුවේ තමිල් ජනතාව මුහුණදුන් වාතාවරණය නිරූපණය නොවීම සැබෑවකි. නමුත් සිනමා කෘතියේ නිරූපිත ජාතිවාදී ප්‍රචණ්ඩත්වය ජාතික ගැටලුවේ මානයක් කියවා ගැනීමට මෙමගින් ඉඟි සපයයි.

'Funny Boy'